Energia og Fjalakötturinn – Ekki amalegt sama daginn.

Mikið er ég búin að eiga yndislegan afmælisdag.  Kveðjunum rigndi inn á Facebook strax í morgun og símtölin og SMSin hafa hlaðist inn í dag.
Um hádegið bauð Eddu Garðars mér í mat á uppáhaldsveitingahúsið okkar Energia í Smáralindinni þar sem við  höfðum það svo huggulegt að við gleymdum okkur alveg, eins og okkur hættir nú reyndar til þegar við hittumst vinkonurnar. Það dróst því í hádeginu fram að kaffi  en þá skrapp ég heim og gerði mig klára fyrir næstu törn sem var kvöldverðarboðið hans Hauks á Fjalaköttinn.

Ég mæli eindregið með Fjalakettinum þegar fara á út að borða. Þjónustan var alveg frábær, salurinn svo fallegur með lifandi blómum á hverju borði og maturinn alveg einstaklega góður og fallega fram borinn. Ég gat nú ekki annað en hlegið með sjálfri mér þegar ég fór að hæla því við þjóninn, hvað hnífapörin væru vönduð og falleg.  Við höfum ekki farið þarna áður en það er sko alveg víst að þarna eigum við eftir að fara aftur þegar við viljum fara fínt út að borða.

Ég sendi þakkir og knús í allar áttir til ykkar elsku vinir og ættingjar fyrir það hvað þið hafið gert mér daginn góðan og eftirminnilegan. Það er kannski eins og Loftur Þór mágur minn sagði þegar hann hringdi og ég sagði honum að það væri sko dekrað við mig í allan dag. Þá sagði hann " Já er það ekki svona þegar maður er orðinn "sixty four?"   Jú mikið rétt hjá Lofti og auðvitað Bítlunum sem sömdu þennan snilldartexta.

Ég bara gat ekki farið að sofa án þess að þakka fyrir mig og segja frá þessum góða degi.