Já, það er nóg að gera þessa dagana. Í gærkvöldi fórum við á opnun málverkasýningar hjá mági mínum Jóni Inga Sigurmundssyni í Eden í Hveragerði. Þarna er mikið af mjög fallegum myndum og ég hvet alla til að fara og skoða sýninguna. Það spillir heldur ekki fyrir að verði myndanna er mjög stillt í hóf, hann hefur alltaf verið of hæverskur þegar kemur að því að verðleggja.
Það var mjög gaman þarna í Eden í gærkvöldi. Ég hitti fullt af fólki sem ég þekki og nokkra sem ég hef ekki hitt í mörg ár. Mikil stemmning við opunina hjá Jóni. Ég þakka bara vel fyrir mig.
FJALLGANGA.
Í morgun hringdi Guðbjörg og spurði hvort við ætluðum ekki að ganga með þeim á Búrfellið (í Grímsnesinu). Við höfðum aðeins rætt það í gærkvöldi á heimleiðinni úr Eden en ekkert var ákveðið. Við vorum auðvitað alveg til í að fara í fjallgöngu svo það var allt sett í gang. Smyrja nesti finna til fjallgönguskóna og setja kaffi á brúsa, ekkert mátti gleymast. Við gömlu brýnin vorum svo sótt og síðan var haldið til fjalla. Þetta var mjög skemmtilegt og veðrið gott. Við vorum um fjóra tíma í gönguferðinni. Þeir Magnús og Haukur þurftu auðvitað að sanna karlmennsku sína og fara heldur lengra en við, en við vorum ekkert að elta þá til að skyggja ekki á þá kappana 🙂
Þessi mynd er tekin af þeim hjúum Guðbjörgu og Magnúsi Má á einum áningastaðnum.
Þegar við komum af fjalli þá var alveg í heimleiðinni að líta við í bústaðnum hjá Rut og Smára og þar sátum við yfir kaffi í góða stund. Það er alltaf svo gaman að hitta þau. Kolla, hennar maður og strákarnir voru hjá þeim og á meðan við stoppuðum komu fleiri gestir en stoppuðu stutt.
Þegar heim var komið dreif ég mig í heitt bað með alls konar fíneríi í og þegar Haukur var búinn að horfa á fréttatímann í Sjónvarpinu, drifum við okkur á Kentucky og fengum okkur kjúkling með öllum túristunum. Við nenntum hvorugt að finna út hvað við ættum að elda svo þessi leið var valin. Allt í lagi svona endrum og eins.
Nú bíður notalegt bólið svo það er best að tefja ekki lengur við skriftirnar.
Magnús minn, ég laumaðist í myndirnar sem þú tókst í dag því mínar myndir eru svo óskýrar – enn einu sinni fer ég þessa leið til að finna myndir. Vonandi fyrirgefurðu mér.
Vá!!!
Jón Ingi er góður!!! og garðurinn þinn er flottur. Leitt að ég féll í beygingagryfjuna með nafnið á Sigurrós (og ég sem er kennari að mennt). Það mun ekki gerast aftur. Farðu vel með þig!