Mér fannst frábært það sem "afi" lagði í orðabelginn við færsluna mína "Laugardagur til lukku" um það hvort nú sé ekki að vænta mikillar flugeldasýningar. Hann sér alveg í gegnum mig. Hann er sjálfsagt minnugur þess þegar ég lærði að ramma inn myndir á netinu og síðan birtust ættingjar og vinir næstu daga, fangaðir í ótrúlegustu römmum.
Já, þetta er einmitt barnið í manni að verða svo glaður yfir nýjum hlutum og nýfenginni vitneskju að það er erfitt að hemja sig.
Ég ætla ekkert að reyna að bæla niður barnið í mér og held mig áfram í skýjunum, a.m.k. á meðan ég dett ekki harkalega niður.
Ég ætla samt að reyna að kaffæra ykkur ekki og læt þessvegna bara eina mynd fylgja með í dag. Nú safna ég bara þessum fyrstu prufum mínum í myndaalbúm
Flottar myndir!
Þetta eru mjög flottar myndir sem þú hefur verið að taka – þegar maður skoðar blóma- og flugnamyndirnar í stærstu útgáfunum þá má m.a.s. sjá frækornin í hárunum á býflugunni! Hlakka til að skoða fleiri myndir frá þér 🙂
Skýum ofar
Í Guðanna bænum haltu þér í skýunum ef að þetta er útkoman. Bíðum spennt eftir framhaldinu. Meira …. meira!!!
Áskorun
Endilega reyndu að kaffæra okkur. Ég tek undir með afa og segi meira. Spurning hvort ég skori á þig að birta mynd(ir) þar sem skuggar spila stórt hlutverk. Þú mátt svo eiga von á því að fá áskorun hvenær sem er um taka/birta myndir af sérstöku efni (þema).
Meiri myndir
Það má með sanni segja að þessi gæða-myndavél hafi ratað í réttar hendur, ég er sammála síðustu ræðumönnum, endilega að halda áfram á þessari braut, myndirnar þínar eru bæði frumlegar og fallegar. Þarna gildir að hafa gott auga fyrir hinu óvenjulega og góðum tækifærum.
Ég þakka uppörvunina
og ætla að reyna að standa mig í þessu. Þetta er allavega mjög gaman og vonandi hef ég sannað að það var ekki bara það, að ég tók ekki nógu góðar myndir á gömlu vélina. Vélin sú var líka VOND.
Kær kveðja til ykkar allra.