Góðir hlutir.

Þá er nú þessi ágæta vika brátt á enda.  Ég fór í bæinn í gær og byrjaði á því að fara með Karlottu og Odd Vilberg til pabba síns en þau áttu að fara með honum til Akureyrar í dag svo þau hafa líklega frá einhverju að segja þegar ég sæki þau í skólann á mánudaginn.

Ég hitti síðan Hauk sem var að ganga frá afsali vegna íbúðasölunnar í Hafnarfirðinum.  Í tilefni af því bauð hann konunni út að borða og var ákveðið þar sem hann var fluttur í Laugarásinn að bjóða í Laugaás.  Mér finnst alveg yndislegt hvað þessi staður heldur sínum uppruna og meira að segja gat ég fundið á matseðlinum fiskigratín, sem mér datt í hug að athuga hvort væri það sama og það sem var í miklu uppáhaldi hjá mér þegar staðurinn var nýr og við Oddur heitinn fórum stundum að fá okkur að borða þar. Auðvitað valdi ég mér því þetta í gær:
"Lauga-ás special Steiktur fiskur gratín"  Mikið rétt þetta reyndist  nákvæmlega sama uppskrift og bragðaðist nákvæmlega eins og í minningunni.  Svona eiga staðir að vera að hætta ekki með góða rétti bara til að breyta yfir í annað.

Í morgun fór ég síðan með Hauki í smá flakk og hann kom heim úr því flakki með hvílíkar stjörnur í augunum að ég er ekki viss um að hann geti sofnað fyrir næturvaktina í nótt.  Ætli ég smelli ekki mynd í næstu viku þegar hann kemur austur ef ævintýrið hans endar vel.

Guðbjörg og Magnús Már komu og fengu kaffi á Austurbrúninni og svei mér þá ef þau voru ekki með stjörnur í augunum líka þegar þau komu.  Já það er nú meira hvað það er mikið að gerast í kringum mig þessa dagana.

Ég ók hins vegar austur í rigningarsudda og þoku og sá engar stjörnur á leiðinni en hinsvegar veit ég að þær eru allar þarna uppi og vonandi ekki langt þar til ég get séð þær.