Frænkuhittingur og fleira.

Það var frænkuboð á sunnudaginn hjá henni Maríu systurdóttur minni. Við hittumst nú það seint að þesu sinni að við slepptum föndrinu en töluðum bara þeim mun meira í staðinn 🙂 Reyndar voru þær með hekl og prjóna Edda og Guðbjörg en það var ósköp notalegt að sitja bara og mala og láta sér líða vel í góðum félagsskap.

Hér eru þær mæðgur María gestgjafinn og mamman Edda.

Í gær var svo danssýningin í Vallaskóla. Mér finnst alltaf svo gaman að fara og sjá hvað krakkarnir hafa verið að læra í dansi yfir veturinn. Í fyrra dönsuðu þau gömlu dansana af krafti en nú voru þetta eingöngu hópdansar svona í stíl við línudansa.

Hver árgangur dansaði sinn dans og hin sátu á meðan og síðan dönsuðu öll börnin í skólanum saman og það var alveg einstaklega skemmtilegt að sjá það þegar nærri 1000 börn dönsuðu í einu í íþróttahúsinu. Þetta er mynd af Karlottu hópi en hún er lengst til hægri í fremstu röðinni. Því miður varð vélin batteríslaus þegar kom að lokaatriðinu en það hefði verið gaman að eiga mynd af því.

 Í gær var líka síðasti dagurinn sem börnin voru í pössun hjá ömmu, allavega í bili því nú er komið jólafrí í skólanum.  Í tilefni af því þá bakaði afi pönnukökur og það var hitað súkkulaði með rjóma og borðaðar smákökur í kaffitímanum í gær, Guðbjörg og Magnús Már fengu auðvitað að vera með.  Þetta voru eiginlega svona litlu jólin okkar og afskaplega notalegt og gott að gera sér svona dagamun á aðventunni. Það sem ég á eftir að gera núna er bara að kaupa í matinn og þrífa og svo á ég eftir að fara í bæinn. Fer þá til Sigurrósar og Jóa, tengdó og í kirkjugarðana og auðvitað í síðustu heimsóknina í þágu vísindanna, ekki má geyma það framyfir jólin, allt svo nákvæmt á þeim stað.

Læt þetta duga í bili, þarf að fara að ganga frá því sem á að fara með í bæinn.