Tengdaforeldraheimsóknir.

Já það má nú eiginlega kalla þessa viku tengdaforeldraviku því á mánudaginn kom Jens tengdapabbi Sigurrósar í heimsókn en hann hefur verið á NLFI í Hveragerði um tíma og vildi líta inn áður en hann færi aftur í bæinn. Við Jens höfum alltaf um nóg að spjalla og ekki spillir að á næsta ári eigum við í vændum sameiginlegt verkefni, en meira um það síðar. Ég var ekki heima þegar Jens kom en Haukur reddaði auðvitað málunum og snaraði sér í pönnukökubakstur eins og honum er einum lagið, svo ég settist bara beint að kaffiborðinu með gestinum þegar ég kom heim og borðaði rjúkandi pönnukökur.

Í gær komu svo þau heiðurshjónin Magnús og Ragna tengdaforeldrar Guðbjargar, en þau hafa verið á ferð hér sunnan heiða þessa viku en halda aftur til Akureyrar á morgun. Það var gaman að fá tækifæri til að fá þau, ásamt fjölskyldunni í Grundartjörninni, í mat í gærkveldi og við áttum virkilega skemmtilega og góða stund saman. Ég vona að þau lendi ekki í miklu vetrarveðri þegar þau aka aftur norður því nú virðist vetur konungur vera farinn að gera sig breiðan á norðlenskum heiðum.

Ég held að fátt jafnist á við að fá góða gesti í heimsókn. Ég nýt þess að minnsta kosti.

————————————

Í morgun fórum við Guðbjörg og Ragnar litli í Reykjavíkurferð, þetta var nú ekki löng reisa því við vorum komin aftur um hádegi til þess að sækja börnin í skólann. Tilgangur ferðarinnar var að ég þurfti að láta skera af mér dularfullan fæðingarblett sem settur var í glas og lagður inn á rannsóknarstofu. Svo var annar frystur. Ekki hef ég nú neinar áhyggjur af því sem kemur út úr þessu því hún Kristín er svo góður doktor að hún reddar því sem þarf að gera ef eitthvað þarf að gera meira.

Síðan skruppum við inn í Kringlu – já það fór þó ekki svo að ég þyrfti ekki að fara í Kringluna. Erindið var að kaupa stígvél á Odd ömmustubb en það merkilega gerðist að við komum stígvélalausar heim. Hann hafði sagt mömmu sinni að hann vildi SKO EKKI smábarnastígvél en við fundum bara ekkert annað, svo nú verður að bera það undir unga manninn hvað skuli til bragðs taka.

Haukur var að fara í bæinn áðan í nýja vinnusyrpu og ég er farin að hlakka mikið til helgarinnar. Þetta hljómar auðvitað þannig að ég hlakki sérstaklega mikið til helgarinnar af því Haukur sé farinn að vinna en það er nú ekki svo. Hinsvegar ætlar Sigurrós að koma og vera hjá mér um helgina og við ætlum að dúllast við að búa til jólakort og gera eitthvað fleira skemmtilegt.

Ætli ég hætti ekki núna og kíki á síðustu mínúturnar í leik Svía og Íslendinga í boltanum. Ég lagði ekki í að horfa á allan leikinn því ég æsi mig upp úr öllu valdi yfir svona leikjum – sérstaklega þó handboltaleikjum.

Ég kveð ykkur í bili glöð og ánægð með enn fleiri góða daga í lífsins farteski.