Svona gengur nú ……..

Karlotta mín var illa haldin í ökklanum sínum á laugardaginn og af því að hún þarf að fara upp stiga í rúmið sitt, sem er hátt og skrifborð undir, þá  kom auðvitað ekki til greina að hún svæfi í því  og ákveðið var að Oddur færi úr rúmi fyrir stóru systur.  Amma var fljót að nota sér tækifærið og af því afi Haukur var í bænum að vinna,  þá sá amma sér leik á borði og fékkk ungan herra í rúmið hjá sér.

Á laugardagskvöldið skemmtum við okkur yfir söngvakeppninni og auðvitað kusum við þá sem okkur fannst skemmtilegastir en ekki fannst okkur nú úr miklu að velja í þetta sinn. 

Um hádegið á sunnudag var okkur svo boðið í ný rúnnstykki og kaffi í Grundartjörnina en næturgestur ömmu sagðist ekkert vera á förum heim til sín strax. Hann gaf sig þó með því loforði ömmu að hann mætti bara koma með henni heim aftur.  Þegar amma hinsvegar fór að huga að heimferð eftir góðgerðirnar þá  var stubburinn greinilega búinn að gleyma því að hann hafði ætlað aftur í Sóltúnið svo amma fór herralaus heim.

Karlotta mín í gifs upp fyrir hné. 

Það er af Karlottu minni að segja að henni leið mjög illa í fætinum alla helgina og í dag var tekið gifsið sem sett hafði verið til öryggis á hana á föstudaginn  og hún var mynduð aftur. Þá kom í ljós að það er sprunga í ökklanum og nú var mín sett í gifs langt upp á læri og alveg fram á tær. Svona þarf hún að vera næstu 4 – 6 vikurnar og má ekki tylla í fótinn. Síðan á að skoða hvort  hún þarf að vera þannig lengur eða hvort hún fær eitthvað lægra og má þá kannski fara að prufa að stíga í fótinn.

Það verða sem sé engir fimleikar  á næstu mánuðum og kannski ekki fyrr en næsta haust. Að öllum líkindum þarf hún að fara í sjúkraþjálfun þegar þessu lýkur til að æfa upp ónotaða vöðva, því það er svo erfitt þegar allur fóturinn er tekinn svona úr umferð.

 Mín reyndi samt að brosa til ömmu þegar hún smellti af henni mynd.

Svona gengur nú lífið fyrir sig hjá okkur hér á Selfossi þessa dagana.