Á næstu grösum.

Nú erum við smám saman að kynnast betur umhverfinu hér og líkar vel. Haukur byrjaði fyrir nokkrum dögum í líkamsrækt í Nautulus sem er á efri hæði  í sundlauginni hérna  í Versölum. Í morgun fór ég svo í minn fyrsta tíma. Ég átti pantaða leiðsögn og mætti því á tilsettum tíma. Það var hins vegar eingöngu á þrjóskunni sem ég mætti í dag, því ég hef nefnilega verið að drepast neðst í bakinu og niður í löpp.  Ég var að hugsa um að snúa við á leiðinni en ákvað að haltra á staðinn og sjá hvort ég gæti ekki lært á einhver af tækjunum.

Ungi maðurinn sem tók á móti mér var svo einstaklega elskulegur og fór um mig silkihönskum þennan fyrsta tíma.  Hann lét mig sleppa göngubrettinu  en kenndi mér á nokkur tæki og það var alveg furða hvað þetta gekk vel. 
Sá lúxus fylgir því að eiga kort í líkamsrækt hér (60+ greiða aðeins tæp 22 þús á ári), að það er innifalið að fara í sundlaugina sem er með heitum pottum, öllum tegundum af vatnsnuddi, gufubað já, öllu því sem sundlaug getur boðið uppá.  Við erum ákveðin í því að nota okkur þetta til hins ítrasta og ég vona að ég verði orðin það góð á mánudaginn að ég geti líka hitað upp á göngubrettinu.   Svo spillir ekki að þetta er nánast í bakgarðinum hjá okkur og tekur innan við 5 mínútur að ganga á staðinn.  Svo finnst Hauki ekki lakara að hann er búinn að hitta þarna flesta sem voru með honum á vaktinni hjá Alcan.

Það næsta sem mig langar til að kynnast er strætókerfið hérna. Ekki það að við höfum tvo bíla hérna fyrir utan og Haukur hefur lítið gefið út á það að fara að rúnta í strætó . Ég er bara svo ferlega forvitin að vita hvaða leið og hvert strætisvagninn fer, sem stoppar hérna við innaksturinn í litlu lokuðu götuna okkar.  Ég er alveg ákveðin í því að fara í einn rúnt með strætónum einhvern daginn og svala þannig forvitni minni.

Ég hef nú þegar skráð mig á heilsugæsluna og fékk bækling um þá þjónustu sem er í boði fyrir utan læknishjálp. Þar má nefna Næringarráðgjöf, Heilsueflingu kvenna, sem er fyrir konur á aldrinum 40 – 69 ára,  þar sem leitað er eftir einkennum og áhættuþáttum ýmissa sjúkdóma sem mikilvægt er að greina snemma. Síðan er allt mögulegt í boði fyrir konur sem ganga með börn, en Guð forði mér frá því að þurfa á slíkri þjónustu að halda. Svo er ýmislegt fleira í boði.  Allt það sem ég hef nefnt í dag er í 5 – 7 mínútna göngufæri frá okkur.

Ég held ég trúi því bara alveg þegar hann Gunnar Birgisson segir sinni dimmu röddu, 

"Það er gott að búa í Kópavogi"