Lasarus.

Það er eins og maður eigi aldrei að ákveða hlutina fyrr en á síðustu stundu og alls ekki að hlakka til einhvers sem í vændum er. Ákveða bara að gera eitthvað með svo til engum fyrirvara þá gengur dæmið yfirleitt upp.   Ég var farin að hlakka til að komast til að dansa um helgina. Eina mannamótið sem ég fór á var hinsvegar að lufsast á læknavaktina.

Já ég fór á læknavaktina seinni partinn í gær, ferlega slöpp með astma og hita. Ég var nú að hugsa um að snúa við í dyrunum þegar ég sá inn í fullan sal af hóstandi og veiku fólki og datt í hug að það væri kannski betra að bera sitt í kyrrþey án læknishjálpar, því Guð mætti vita hvað maður gæti náð sér í á svona stað.

Ég fór þó að borðinu og spurði hvað það væri margra klukkutíma bið.  Þetta er nú ekki eins slæmt og það lítur út fyrir, sagði þá elskulega móttökudaman, það eru í mörgum tilfellum fleiri en einn saman og svo eru læknarnir fjórir sem taka á móti. Ég ákvað því að láta tilleiðast og fann eftir nokkra leit sæti  og tók upp bókina sem ég af mikilli skynsemi sett í verskið mitt. Nei, þetta var ekki bankabók. þetta var spennandi saga eftir Patriciu Cornwell. Ég beið því róleg, reyndi að anda bara með nefinu – ef utanaðkomandi bakteríur síuðust kannski frekar frá með því móti- og las svo í nærri klukkutíma og tíminn var ótrúlega fljótur að líða þannig.

Það er svo skemmst frá því að segja að ég var sett á sterakúr (Prednisolon)við astmanum og blóðþrýstingurinn var mældur og var enn einu sinni allt of hár og púlsinn í 123 í hvíld. Það fannst lækninum nokkuð mikið. Ég fullvissaði hann um að þetta væri ekki af því að ég hefði lent í slagsmálum frammi til að komast fyrr inn, heldur hefði ég setið alveg kyrr og róleg við lestur þar til kallað var á mig.  Kannski var bókin svona spennandi, ég veit ekki hvort það getur haft slík áhrif en þetta er eitthjvað sem ég á að láta athuga frekar.  Var reyndar búin að fara í línurit og eitthvert vesen þegar ég varð svona síðast en ekkert kom út úr því.  Kannski verð ég bara að hætta að lesa bækur eftir Patriciu Cornwell og gá hvort púlsinn og blóðþrýstingurinn lækkar eitthvað við það.

það er hinsvegar af þessu Prednisoloni að segja að ég verð bara ekkert syfjuð þegar ég tek það. Vakti í alla nótt, blundaði síðan svona af og til í þrjá tíma í morgun og er sko ekki orðin vitund syjfjuð núna klukkan að ganga ellefu. Það er hinsvegar verst að verða þreyttur en ekki syfjaður.

Hei,  Hvar er nú jákvæða konan sem hvetur alla til að vera bjartsýna?  Best að gá hvort hún er ekki bara í stólnum mínum hérna inni í stofu. Ég ætla því að fara og hverfa inn í þá jákvæðu.

Verð svo vonandi hressari næst.