Enn einn fallegi dagurinn, sem lætur okkur gleyma öllum leiðindum, hefur nú litið dagsins ljós. Heiðblár vetrarhiminn svo langt sem augað eygir – ekki amalegt það.
Ég er að fara til lungnalæknis í dag og vona að hann finni út úr blóðþrýstingsruglinu og astmanum, sem ekki vill gefa sig. Það er nefnilega tímabært að fara að sigrast á heilsuleysi síðustu vikna og snúa sér að því að gera eitthvað skemmtilegt.
Ég vona allavega að ég fái grænt ljós til að geta farið seinna í dag með Ásakórsfjölskyldunni í sumarbústað, sem löngu er búið að panta. Það hefur verið hefð fyrir því alveg síðan börnin byrjuðu að ganga í skóla að amma og helst afi líka, hafa komi með í vetrarfríferð í sumarbústað. Nú er komið að slíku fríi og það stendur bara á ömmu að fá grænt ljós hjá lækninum til þess að komast með.
Þegar ég horfi á fegurðina úti, þá get ég bara ekki annað en verið bjartsýn .
Bjartsýn á að þjóðin nái að vinna sig út úr erfiðleikunum.
Bjartsýn á að þeir sem hafa tímabundið misst störf sín fái fljótt vinnu aftur og að þeir geti notað biðtímann vel til þess að byggja sig upp til þess að takast á við ný störf á nýjum vettvangi.
Bjartsýn á að eitthvað gott komi út úr þessu öllu saman.
Umfram allt ætla ég að leyfa mér að vera bjartsýn í dag, hvort sem það þykir raunhæft eða ekki.
Látum þetta ástand í þjóðfélaginu vera áminningu um að huga betur að því sem gefur lífinu gildi, í stað þess að dansa endalausa hringi í kringum gullkálfinn sem hefur staðið alskapaður fyrir framan okkur Íslendinga í nokkur ár og freistað þeirra sem fram hjá fara.
Nú þurfum við að átta okkur á því hvað það eru margir í heiminum sem lifa í algjörri örbyrgð. Þeir þættust góðir að fá að lifa í kreppunni okkar.
Fleiri verða vangaveltur mínar ekki í bili.
Ég sendi ykkur góðar kveðjur og óska ykkur góðrar helgar.
Vonandi færðu grænt ljós á sumarbústaðaferð með fjölskyldunni!
Kær kv.
Vonandi verður þú nógu góð til að fara í bústaðinn. Lofaðu okkur að fylgjast með. Þetta með bjartsýnina tek ég undir heilshugar. Kær kveðja í kotið.
Endilega leyfðu okkur að sjá hvort þú fáir að fara með,ok? Við viljum nefnilega að þér líði sem best :=)Hafðu það gott og takk fyrir fallegan pistil.
Það er víst best að losa ykkur við áhyggjurnar og láta vita að frúin er í góðu lagi – hún er bara ekki í tölvusambandi eins og er 😉