Útskrift Jóa o.fl.

Ég byrja nú á því að óska honum Jóa til hamingju með útskriftina á laugardaginn, en nú er hann orðinn tölvunarfræðingur með BS gráðu. Það var gaman að fá að fagna þessum áfanga með honum, Sigurrós og fjölskyldu Jóa. Það hittist þannig á að margir voru fjarverandi sem annars hefðu komið. T.d.voru Guðbjörg og Magnús Már úti í Hollandi í kennaraferð.  ´
Eftir veisluna ætluðum við Haukur að skella okkur á Harry Potter og vorum mætt upp úr klukkan hálf átta í Álfabakkann til að kaupa miða. Þegar við komum að anddyrinu var hvílík stappa af fólki, aðallega börnum og unglingum, bæði að bíða eftir að komast inn í salinn og margfaldar raðir að kaupa miða. Okkur féllust algerlega hendur og snautuðum í burtu. Líklega er laugardagskvöld klukkan átta ekki sá tími sem fólk á okkar aldri drífur sig í bíó. Við ákváðum bara að reyna aftur seinna. En, það er bara svo oft sem við missum af myndum í stórum sal af því að við „ætlum bara seinna“. 

Við fórum svo bara í bíltúr að skoða nýja hverfið við Ástjörnina í Hafnarfirðinum og síðan í A.Hansen þar sem við fengum okkur humarsúpu.
Daginn eftir á sunnudeginum fór ég svo austur ásamt Sigurrós sem ætlaði að heimsækja mömmu en Haukur varð eftir til þess að fara að vinna um kvöldið.

Sigurrós segir frá okkar ferðum á vefnum sínum  svo ég vísa bara til þess.
Í dag fórum við svo aftur til borgarinnar. Við áttum báðar erindi á Hárgreiðslustofuna okkar, en stofan heitir reyndar Hárgreiðslustofan mín, síðan fórum við í Betraból og fengum okkur að snæða og svo sótti ég Odd og Karlottu til pabba síns í Kópavoginn. Þau voru mjög ánægð með ferðina til Egilsstaða en þar hittu þau föðurfólkið sitt og fóru m.a. á Borgarfjörð eystri til að hitta langömmu og langafa.

Oddur og Karlotta komu hérna heim í Sóltúnið með mér og biðu síðan spennt eftir að mamma og Magnús Már kæmu heim frá útlöndum. Þau sátu úti á bekknum til að sjá þegar þau kæmu. Þau komu svo rétt fyrir kvöldmat bæði með gullhring á baugfingri. Húrra, til hamingju með það !!! ( nú vildi ég geta sett fallegt rautt hjarta í textann). Við borðuðum svo hérna saman og síðan fóru þau heim í Urðartjörn en ég dreif mig í að setja í þvottavél, nokkuð sem ég var búin að trassa að gera.

Nú er best að koma sér í rúmið til að vakna snemma til að fara í göngutúr það er nefnilega spáð fínu veðri á morgun. 
Já, svo má ég ekki gleyma því að hún Ingunn mágkona í Ameríkunni á afmæli á morgun. Til hamingju með það Ingunn mín. Hjá mér er nú reyndar kominn 16. júní því klukkan er orðin svo margt.