Amma og næturgestirnir!

Á föstudagskvöldið fékk ég næturgesti. Mér fannst svo tilvalið að Oddur og Karlotta gistu hjá ömmu af því morguninn eftir ætluðum við í bæinn saman. Við horfðum á fjölskyldumyndina á RÚV og síðan fóru þau í rúmið og kíktu aðeins á gömlu Andrésblöðin (sum frá 1964) og áður en ég vissi af voru þau sofnuð. Það var ekki mikil fyrirhöfn að hafa þessa næturgesti.

Oddur og Karlotta nývöknuð í gestaherberginu hjá ömmu.

Á laugardagsmorguninn fórum við síðan í bæinn eins og ákveðið hafði verið. Við fórum beint upp í Mjódd á Brúðarkjólaleigu Katrínar þar sem við hittum Sigurrós. Síðan var byrjað að máta brúðarmeyjakjóla á Karlottu. Það var ekki til númerið hennar og kjólarnir voru ýmist aðeins of litlir eða of stórir. Ég sá eftir að hafa ekki verið með myndavélina því hún var svo hátíðleg á svipinn yfir alvöru málsins. En við verðum að leita betur að passandi kjól. Líklega förum við strax eftir næstu helgi og kíkjum betur á þetta. Það voru líka mátuð þjóðhátíðarföt á stubbinn en hann var ekki eins hátíðlegur yfir þessu og systir hans og hafði miklu meiri áhuga á ýmsu sem hann sá í kringum sig (alveg týpiskur strákur). Það var sama sagan með fötin á hann, buxurnar voru allt of víðar og ekki til jakki í hans stærð. Við þurfum sem sé að athuga það mál betur líka. Annars keypti mamma hans svona vesti og skyrtu á hann fyrir jólin og svartar buxur. Það er hugsanlegt að það passi á hann ennþá því það var keypt við vöxt.

Sigurrós tók síðan að sér að fara með krakkana til pabba síns en ég fór að hitta vinkonurnar sem ég vann með á sínum tíma. Sivva er nýflutt og hafði boðið okkur að koma og skoða nýja heimilið sittt. Eins og venjan er þegar Sivva á í hlut þá hafði hún töfrað fram fram spennandi og gómsæta rétti sem hún bauð okkur uppá.

Til hamingju Sivva með fallega heimilið þitt.