Magnað kvöld – Kjósum Magna.

Já það er sko Magnað kvöld framundan og ég ætla að taka þátt í því með stæl. Reyndar verð ég bara ein í partýinu því Haukur er farinn í bæinn að vinna en ég ætla að horfa á hann Magna slá í gegn í Rock Star Supernova og kjósa svo villt og galið á eftir. Ætli ég kaupi mér ekki meira að segja popp til að hafa í partíinu mínu svo þetta verði svona alvöru sjónvarpspartí.

Ég hélt að í síðustu viku væru loka kosningarnar en það á enn eftir að kjósa svo nú er að duga eða drepast fyrir okkur íslendinga að koma Magna í lokaúrslitaþáttinn sem verður á morgun. Við getum ekki látið það sannast á okkur að koma honum svona langt og sleppa svo af honum hendinni þegar að úrslitum kemur.

Ég vil þó undirstrika að ég er ekkert spennt fyrir því að láta hann vinna þennan slag því mér finnst hann engan veginn passa inn í þennan félagsskap. En hann er búinn að standa sig svo vel og verið landi og þjóð til sóma allan tímann og verður því að fá að vera með allt til enda.

Magni er góð landkynning – kjósum hann  eins oft og við getum í nótt.

Förum inn á http://www.rockstar.msn.com/ og þegar sagt er í þættinum að búið sé að opna fyrir kosningu fara þá strax inná og smella á "vote" sem birtist undir Rock Star Supernova merkinu fyrir miðju efst á síðunni og kjósa svo án afláts eins lengi og maður hefur krafta til.

(Ég lenti í því fyrst að smella á vote vinstra megin til hliðar og fékk þá alltaf einhverjar upplýsingar sem ég hafði ekkert með að gera. Þessvegna er ég nú með þessar lýsingar fyrir þá sem ekki hafa enn kosið)

Góða skemmtun.

Ég veð að smella hérna inn einni mynd frá heimahögunum hans Magna.

Ekki efa ég að vel verður tekið á móti Magna þegar hann kemur á Borgarfjörð eystra að öllu þessu Ameríkuævintýri loknu.