Kannist þið við svona daga þegar allt virðist svo öfugsnúið.
Ég var auðvitað grútmygluð þegar ég vaknaði í morgun og get vitanlega kennt sjálfri mér um það því ég svaf illa í fyrrinótt og var svo að vaka frameftir í nótt að kjósa hann Magna svo hann gæti verið með á lokasprettinum í Supernova. Ég hresstist nú nokkuð eftir hádegið þegar ég var búin að fá mér sterkt og gott kaffi.
Mér fannst komið svo mikið af auka dóti á borðið í þvottahúsinu sem ég hef til að sníða á tuskurnar mínar í bútasauminn og ákvað að laga svolítið til þarna. Ég sá að það var svo til alveg autt borð í bílskúrnum og sá mér leik á borði að notfæra mér það og færa tuskukassana þangað yfir því það væri stutt að fara til að kippa þeim innfyrir þegar á þyrfti að halda.
Ég byrjaði á því að taka eina kassann sem var þarna á borðinu í skúrnum og færa hann upp í hillu. Ekki vildi þá betur til en svo að botninn opnaðist og innihaldið datt á gólfið. Ég var nú svo sem ekkert lengi að tína það upp en svo leiddi hvað af öðru. Á þvottahúsborðinu var há flaska sem er vafin með tágum og hún stóð ofan í lítilli tágakörfu sem hvorttveggja var úti í sumar en hafði verið tekið inn og sett á þetta blessaða borð þar sem allt sem er í bið er sett á. Einhvernveginn, sem ég ekki átta mig á þá hef ég rekið það sem ég var að færa til í þessa blessuðu flösku og hún hentist út á flísalagt gólfið og stúturinn brotnaði í þúsund mola inni í tágavafningnum og glerbrotin út um allt. Þetta var í sjálfu sér alveg nóg ef í leiðinni hefði ekki dottið lítil plastkarfa með haldi, sem ég hef títuprjónana mína í. Á gólfinu var sem sé allt í glerbrotum og títuprjónarnir innanum. Þetta var svona eins og einhver óhugnanleg sprengja hefði opnast þarna. Eftir nokkra leit fann ég gamla segulstálið sem ég á síðan ég var krakki og náði með því að hreinsa prjónana frá glerbrotunum svo ég gæti sópað þeim upp.
Ég er mikið að hugsa um að gera ekkert fleira í dag því ég veit ekki hvað gæti gerst. Ætli það væri ekki réttast að panta bara pízzu í kvöldmatinn, nokkuð sem ég geri ekki oftar á ári en ég get talið á fingrum annarrar handar og fá hana senda heim til að hreyfa ekki bílinn. – Svona til öryggis svo ég brenni mig ekki eða gleymi að slökkva á eldavélinni ef ég færi að elda mér mat.
Svo ætti ég kannski að hætta að leika táning sem horfir á rokk fram eftir nóttu og fara heldur að haga mér eins og sómakærri eldri dömu ber að gera og fara í rúmið á skikkanlegum tíma og vakna svo hress og kát og vera myndarleg til allra verka yfir daginn.
Ég kveð ykkur í bili langt frá því að vera myndarleg.
Sumir dagar
Þetta er alveg mögnuð frásögn Ragna og getur maður vel sett sig í spor þín.. Suma daga á maður bara að liggja í rúminu og bíða eftir að hann líði..
Það fæddist létt bros á munninn og gott ef ekki heyrðist smá hlátursstuna við lesninguna líka..
Sorry, það er bara pínu fyndið að lesa um óheppni annarra en mína eigin..
Thíhíhí..
Þó það sé auðvitað greinilegt af frásögninni að þú þarft á þínum nætursvefni að halda – þá vona ég samt að þú hættir aldrei að haga þér eins og táningur! Það er miklu skemmtilegra heldur en að vera heldri dama 😉
Elsku Ragna mín! Svona dagar mættu alveg missa sig en vonandi verður kvöldið þér gott og hver veit..vegna tímamismunar þá ertu kannski að gæða þér á góðri pizzu akkúrat núna.