Ég tek það fram að hugleiðingar þessar eiga eingöngu við um tískufyrirbærið en ekki annað.
Það fer ekki fram hjá neinum sem fylgist með fjölmiðlum að konur eru með brjóst. Hérna áður fyrr voru þau af öllum, stærðum og gerðum og voru þær sem þau báru ýmist ánægðar eða óánægðar með sín brjóst. Mæður gáfu börnum sínum að drekka úr brjóstum sínum, stórum og smáum, og engin hætta var á því að aukaefni bærust úr brjóstinu til barnsins nema þá ef móðirin hafði borðað eða drukkið eitthvað óæskilegt.
Nú er öldin önnur og nú skulu konur á öllum aldri bera brjóst samkvæmt fyrirfram ákveðnum stöðlum, og þegar ég segi konur, þá á ég við konur allt niður í fermingarstúlkur. Brjóstin skulu alltaf fylla á réttan hátt út í fötin og alltaf halda réttu lagi sínu, hvort sem staðið er, setið, eða lagst niður. Ekki fer framhjá neinum sem gengur um sólarstrendur eða sundlaugabakka, hvaða konur uppfylla staðalinn því þessi „fullkomnu“ brjóst vísa alltaf beint fram.
Þessi tískubóla eins og aðrar slíkar náði vitanlega til Íslands og Guð má vita hversu margar íslenskar konur hafa nú brjóst samkvæmt þessum flottu stöðlum. Heyrst hefur að ungar óþroskaðar stúlkur hafi jafnvel fengið slík brjóst í fermingargjöf. Ég hef ekki hugmynd um hvaða verð konur hafa verið að greiða fyrir það að vera með réttan brjóstastaðal, en dýrt mun það vera.
Mitt í allri sælunni er nú komið upp vandamál – stórt vandamál – sem eðlilega hefur komið miklu róti á þá sem fylgja staðlinum. Dýru flottu brjóstin eru farin að leka og það sem meira er, efnið í þeim er sílikon sem notað er til iðnaðar. Þetta hefur verið fyrsta frétt fjölmiðla í marga daga og velferðarráðherra hefur lýst því yfir að ríkið skuli kosta rannsóknir og það að fjarlægja þessa púða. Misminnir mig, en var ekki rætt um það fyrir áramótin að nú þyrftu krabbameinssjúklingar að taka á sig mun meiri kostnað við meðferðir, en verið hefur ?
Vitanlega hafa konurnar samúð mína vegna þess að brjóstapúðarnir hafa sprungið og heilsu þeirra er ógnað. En það vakna jafnframt hjá mér spurningar eins og –
Hver er ábyrgð þeirra, sem sjálfviljugar hafa farið á einkastofur til lýtalækna til þess að láta setja aukaefni í líkama sinn, eingöngu til þess að líta betur út?
Hver er ábyrgð þeirra, sem hafa þrátt fyrir það að vera með aukaefni í brjóstunum, látið ungbörn sín sjúga „næringu“ úr þeim? Ungbörnin hafa ekki haft neitt val og ekki kusu þau að njóta vafans.
Það er auðvitað alveg hræðilegt að fyrirtæki skuli hafa sett á markað gallaða vöru sem getur skaðað heilsu kvennanna sem keypt hafa efnið og fengið það sett í líkama sinn. Það er líka sjálfsagt að setja strangar reglur um þá hluti og efni almennt, sem læknar taka að sér að setja í fólk og slíkt þurfi í framtíðinni að fara í gegnum rannsóknir og fá vottun áður en það er notað.
En hvenær á að kenna okkur það, að við getum ekki alltaf anað áfram ábyrgðarlaust og elt hverja tískubóluna af annarri?
Getur verið að það veiti svo mikla hamingju að láta setja silikon hér og botox þar til þess að líta flottar út, að við getum gert það sem okkur sýnist við líkama okkar, þann líkama sem okkur var ákvarðaður við getnað?
Þurfum við ekki einu sinni að hugsa um hvort við séum að gera rétt eða rangt, þegar við tökum ákvörðun um að láta setja aukaefni í líkamann, eingöngu til þess að fegra hann?
Ber okkur ekki skylda til þess að bera ábyrgð á líkama okkar og varðveita hann með heilbrigðu líferni og reyna að vernda hann frá öllu því sem getur skaðað hann, að ekki sé nú talað um að varðveita nýfædd börnin okkar fyrir eigingjörnum ákvörðunum okkar.
Kæru bloggvinir mínir – fyrirgefið mér rausið. Mér finnst bara svo fáránlegt á sama tíma og það er endalaust skorið niður í heilbrigðiskerfinu okkar og krabbameinssjúklingar þurfa að bera æ meiri kostnað sjálfir af meðferð sinni, þá ætli ríkið að greiða allan kostnað vegna þessara gölluðu brjóstapúða sem konur hafa, bara sér til fegurðarauka, keypt og látið setja í sig á einkastofum úti í bæ. Kannski er ég ósanngjörn, en hvað finnst ykkur. Endilega tjáið ykkur hérna á heimasíðunni með því að fara í „Leave a comment“
Ég gæti ekki verið meira sammála þér Ragna. Það er alveg með ólíkindum að ríkið skuli alltaf skera niður þar sem mest er þörfin! Fyrir utan krabbamein sjúklingana, þá er líka búið að taka af alla þá aðstoð við fólk sem glýmir við ófrjósemi. En hins vegar, ef kona vill fara í fóstureyðingu þá mun ríkið greiða fyrir hana á sama tíma og kona sem missir fóstur og þarf á útskröpun á halda, semsagt sama „aðgerðin“, þá þarf sú að greiða sjálf!
Ég veit svei mér ekki hvað er að verða um góða Ísland!
Já það er erfitt að skilja þetta og gamla góða Ísland virðist því miður alveg týnt um þessar mundir.
Sammála þér að flestu leyti. Eins og með bankana var hagnaðurinn einkavæddur en tapið ríkisvætt. Eins á að vera með þetta nema vitanlega þarf að koma til inngrip ef heilsu einhverra verður skyndilega verulega ógnað. Víða líflegar umræður á bloggsíðum um þetta. Hér er eitt dæmi: http://jonvalurjensson.blog.is/blog/jonvalurjensson/entry/1216601/
Mér finnst alveg sjálfsagt að greiða þetta fyrir þær konur sem hafa þurft ,,ný brjóst“ vegna krabbameins og fá þá gallaðar fyllingar. En fyrir þær sem fara í þetta sem fegrunaraðgerð finnst mér að það eigi alls ekki að borga. Mér skilst að konur þurfi að skrifa undir skjal þess efnis að þeim sé kunnugt um áhættuna sem fylgi t.d. að púðar geti rifnað ofl.
Pant ekki borga fyrir annarra kvenna brjóst!!!!!!!
Eins og Magnús segir, þá þarf auðvitað inngrip ef heilsu er verulega ógnað – sama af hvers völdum það er. Af hverju eiga þessar konur ekki að greiða sjálfar fyrir lagfæringarnar með tilliti til þess að þær tóku, eða hefðu átt að gera sér grein fyrir því að þær tóku áhættu með svona aðgerð.
Er ekki tæpur helmingur alþingis skipaður kvennfólki???
Jú Eiki og skiptist jafnt í ráðherraliðinu.
Ég er þér svo hjartanlega sammála Ragna. Er búin að þusa við sjálfa mig og bóndann um þetta mál. Ég skil ekki hvað þessar konur hafa verið að hugsa þegar þær tóku ákvörðun um aðgerðina. En þessu má ef til vill lýkja við reykingar, það er sannað mál að þær skaða heilsuna, samt eru margir tilbúnir að borga tugi þúsunda á mánuði fyrir eitrið. En hver borgar svo lyf og læknishjálpa ef/þegar fólk veikist af völdum reykinga?
Já Þórunn, mér finnst allt of lítið talað um þann þátt málsins að fyrst af öllu verði hver og einn að bera ábyrgð á gerðum sínum.
Þetta eru þarfar pælingar.
Ég er hjartanlega sammála þér mín kæra. Ég held að ég fari rétt með að brjóstauppbygging hjá okkur krabbameinskonum fer ætíð fram á spítalanum, og þessir PIP púðar eru ekki notaðir þar. Útlitsdýrkunin er orðin svo yfirgengileg að það nær ekki nokkurri átt. Hvíttaðar tennur, varir eins og sogskálar, brjóst í yfirstærðum og brasilískt vax setur svo punktinn yfir vitleysuna. Eftirlit á Íslandi, í hverju sem er er handónýtt. Með kærri í bæinn
Þetta er hverju orði sannara Guðlaug mín.